கடும் புனலில் 
                         நீந்திய  காமம் 
                         தனித்து  தடுமாறி 
                         தத்தளித்து  
                         கரை  ஏகிய போது
                          புத்தராய் சிரித்தது.
                          

அம்மா இறந்த  இந்த 2 வருடங்களில் இப்போது மாற்றியது 3 வது வீடு.ஒரு வாரத்திற்கு மேல் ஆகிறது மூட்டைகள்  பிரித்து அடுக்கேன்  என்கிறது. எனக்கு அலுவலக வேலையே சரியாக இருப்பதால் தங்கை தான் எடுத்து வைக்கிறாள் பொறுமையாக ...........
 10 வருடங்கள் கூட ஒரு வீட்டில் இருந்திருக்கிறோம் ! . ம்ம்...... ஒரே நாளில்  பொருட்கள் எல்லாவற்றையும் தனியாகவே  பாக்  செய்து விடுவார்.அம்மா .. பரணில் இருப்பதை மட்டும் எடுத்து தந்தால்  போதும். புது வீட்டுக்கு வந்த அந்த  இரவே சமையலறையை ஒழுங்கு படுத்திவிடுவார். மறுநாள் அலுவலகம் சென்று திரும்புவதற்குள் வீட்டில் எல்லா பொருட்களும் அடுக்கி வைக்கப்பட்டிருக்கும் . புது வீடு சீக்கிரம் பழகிய வீடாகிவிடும்..  

          அம்மாவின் நேர்த்தி, ஒழுங்கு, உழைப்பு, துரிதம்  எல்லாமே எப்போதும் பிரமிப்பாய்  இருக்கும் . இதுவே  அவர் மேல் ஒரு மதிப்பையும் மரியாதையையும்  ஏற்படுத்திவிடும்.

 இன்று "'அன்னையர் தினம் '"அம்மா இருந்த போது அல்ல. இறந்த பின்பே  அவரின்  மாண்பு  புரிகிறது......

                                                                        

                                                                            கடமைகள் குறித்த 

                                                                            கவலை  அவ்வளவாய் 

                                                                             இல்லவேயில்லை..

    

                                                                              துன்பங்கள் 

                                                                              துயரங்கள் 

                                                                              துக்கிகவேயில்லை 

                                                                              பிரளயமாய் 

                                                                               பிரச்சனைகள் 

                                                                               பொருட்டேயில்லை .

                                                                                 தாக்குதலின் 

                                                                                    தீவிரம் 

                                                                                    தாங்கி 

                                                                                 கவசமாய் 

                                                                                 இருந்தார் 

                                                                                  அம்மா .

               

                 அலாதியாய்
                 அநாதியாய்
                  அமைதியாய்
                  அடக்கி
                   அடங்கிவிடும்.

                                                      ஆசையாய்
                                                       ஆணவமாய்
                                                        ஆர்ப்பரிக்கும்
                                                         ஆதரிக்கும்
                                                         ஆட்டிவைக்கும்.

                   கருணை
                   கம்பீரம்
                   கலகம்
                   குரூரம்
                   கயமை
                   காதல்
                   மொழிவன

                                                              பாசம்
                                                              பகட்டு
                                                              பொய்
                                                               புகழ்
                                                               பாவம்
                                                               பகை
                                                               பாராட்டுவன


                 வன்மம்
                 வசீகரம்
                 வக்கிரம்
                 வாத்சல்யம்
                 வருத்தம்.
                 நிரம்பியன.


                                                             மெய்மை
                                                              மயக்கம்
                                                              மகிழ்வு
                                                              மதிப்பு
                                                              மனபிறழ்வு
                                                              மரணமும்    
                                                              தரவல்லது

             
                   சொற்கள்.........


                                                               பிரயோகமாகும்
                                                               தருணம்
                                                               தக்க பதிலை
                                                               தேடி  தொலைத்து
                                                                      விடுகிறேன்
             
                   என்  சொற்களாலான
                           என்னை.
               

                              எரியப்பட்ட
                               கற்களின் 
                              அலைகள் 
                              அதிர்வுகள்
                               அடங்கி 
                               ஆழத்தில் 
                                அமிழ்ந்தன 
                                அப்போது.

                                                         அசைப் போட்டபடி 
                                                          அமைதியாய்
                                                           அவதானிக்கிறது 
                                                          வற்றி, வறண்டும் 
                                                           இப்போது 
                                                            குளம்.
 

அம்மா
அப்பா
தங்கை
தம்பி
மகன்
மகள்
உறவு
நட்பு
காதல் 
எல்லாருமே
அவரவர்க்கான --என்
சட்டகங்களில்
பொருந்துவதே  இல்லை.


எனக்கேயான  என்
சட்டகத்தில்
பொருத்திப்பார்க்கிறேன்
முடியவில்லை
எந்நாளும்
என்னாலும்.
                                                          sattagam = frame

                                       வலை
       
           அன்பு, காதல்
           பாசம்  கருணை
          அநேக வலைகள்
          ஆக்கிரமிக்க .......


           இரை' யொன்றே
           எல்லாவற்றுக்கும்
           குறி..........

           உறவாய் துணை
           துணையாய்  இதம்;
           இதமாய் ; கஞ்சி!

           இரைதரல் ,
           இரையாதல்'  தான்
            தியாகம்
           சொல்கிறார்கள்-------

           நான்,  உன்னை
           நீ , என்னை   
           வளைக்கத்தான்
           வேண்டுமெனில்
           நல்ல  எதிரிகளாகவே
           நாம்  இருப்போம்.

          நட்பேனும்
          பாழாகதிருக்குமே!  
                
          
         

      நெஞ்சு தாளாது,
      கண்  வழி  யத்தனிக்கும்.
       பற்றிக்கொள்ள  விரல்கள்
        பரிதவிக்கும்.

      களைத்தும் ,
      துவண்டும் ,
       பின்னும்  கால்கள்.

       புறம் மறந்து
       அகவயப்படும்
       கணங்களில்,
      பொன்னரளியின்
      பொதிந்த  தேனை
      பருகிப்  பறக்கும்
      சிறு  கருங்குருவியாய்
                நான்.